睇人

睇人(眼神)有時係會睇到一種忠奸既感覺。
但如果用依種感覺去判斷一個人,其實都會出事。
睇到奸既感覺果D人,通常95%係濕鳩。但睇到忠既感覺果D人,有部份都可能係仆街

識既人之中有D人我覺得感覺係一副善良﹑真性情﹑冇乜心計既感覺,而的確依d係佢地既真我性格特質;但鑽起牛角尖上黎都可以O係一D事上面做到好仆街,會用好多犬儒藉口﹑奇怪邏輯,去合理化佢地自己既仆街。

我諗個問題係當一個善良﹑正氣既人既價值觀被扭曲,就可能會變成做出一d o係其他人眼中係仆街既事,但佢地覺得自己做既野係正確﹑合乎道德﹑善良。

我明白到,睇人唔可以淨係睇表面既忠奸。
我突然記起十年前有朋友同我講:「你以為依D係岩﹑依D係錯,咁係因為你係好人。但其他人唔係咁諗。」
你以為某個人係好人佢就唔會做仆街野﹑唔會害你,其實係少年你太年輕了.jpg,你將「好人」兩個字睇得太簡單﹑表面。

(頭盔mode,何謂對錯何謂正確價值觀並無絕對答案,我都可能係上面講緊既果D人,我唔會去resolve依個哲學問題。)

越大個越認識依個世界越睇更多人,越覺得人不可信。
心智水平低既人,易墮入思想陷阱,價值觀易被扭曲操縱,而且當思想loop死左你好難同依d人溝通。依d人不可信,否則遲早害死你。
立心不良既人,往往只係考慮點利用你。依D人更絕不可信。
心智水平正常又心地善良既人,依d係可以做朋友。然而你要明白,如果做「真心交」朋友就盡量唔好有利益衝突,因為當有利益關係,依d心智正常又善良既人都只係人,你唔可以肯定佢地會唔會有日為左利益出賣你。
唔好考驗人性去令自己傷心破財,除非你睇化晒,一早預左都要咁做。

最後係我自己既小總結:
睇到奸既小人就盡量避開啦;睇到忠既人係可以做下朋友,但唔好因為人地係好人就以為人地唔會做仆街野,防人之心不可無
淡薄﹑萍水相逢﹑避免利益關係﹑要識得分d朋友係邊類朋友﹑保持安全距離,依個係我對大部份朋友既態度。

Leave a Reply

Your email address will not be published.